Tatlong dekada na sa showbiz industry ngayong Mayo 2023 ang award-winning aktres na si Ara Mina. Nagsimula ang career ni Ara nang mapasama siya sa sikat na youth-oriented program noon ni German Moreno na That’s Entertainment.

Ani Ara, hindi biro ang umabot ng 30 taon sa showbiz kaya ipinagpapasalamat niya ito nang husto.

“I’m very thankful. Siguro ano lang, kailangan you keep grounded pa rin kung anuman yung success na na-achieve mo. Okey pa rin naman ako kung hindi man ako bida lagi kasi that’s your passion, eh.

“Pag mahal mo ang trabaho mo at kapag napamahal ka sa trabaho mo hindi ka na yung, ‘Ay gusto ko lagi akong bida!’ You need to try all kinds of portrayal, mapa-supporting roles, mother roles, malandi, whatever, lahat.

“If you’re an artist hindi ka masyadong nagkakaroon ng restrictions. Kumbaga, dapat versatile ka para tumagal ka sa industriya. And siyempre dapat mahalin mo yung craft mo, mahalin mo yung mga tao na sumusuporta sa ‘yo.

“And very thankful ako kasi si Dave (Almarinez, ang kanyang asawa) super supportive sa career ko. Siyempre alam niyang passion ko ’to. But I’m trying my best na magampanan ko pa rin yung obligasyon ko as a wife, as a mom and entrepreneur kahit nagtatrabaho ako. I am really trying my best na ma-manage ko yung time,” dire-diretsong pahayag ni Ara sa PUSH interview.

BASAHIN: Ara Mina may ritual para makabuo ng baby boy

Sa 30 years ba niya sa showbiz ay naramdaman din niyang malaos?

“Hindi ko kasi nilagay sa utak ko na sikat na sikat ako. Kasi pag nilagay mo sa utak mo na sikat ka pag nawalan ka ng project do’n, maiisip na ‘ay, laos na ako,’” katwiran ni Ara.

“I’ll be honest, may mga nakausap akong artists before and tinatanong nila ako kasi nga wala silang project. Parang they ask me, ‘Laos na ba ako?’ As in talagang ganun yung tanong nila sa akn.

“Sabi ko, huwag mong isipin yan, ganyan-ganyan. So, ako pag wala akong project nagbi-business ako kasi nga I’m a very workaholic person. Para hindi ko maisip na, ‘Ba’t wala akong project? Wala akong ginagawa. Ba’t ganun, laos na ba ako?’ Hindi mo maiisip yung ganun kasi pag wala kang work sangkatutak din yung ginagawa ko for my business.

“Nag-iisip ako kung ano bang puwedeng gawin para pag wala akong work meron akong ibang ginagawa at meron akong fallback someday. Right now, ito it’s another business which is yung future natin dito na tayo papunta,” paliwanag ng aktres.

Ipinagmalaki din ni Ara na never niyang naisip na mag-quit sa showbiz kahit may mga panahong wala siyang ginagawang teleserye o pelikula.

“Well, hindi naman!” diin ni Ara. “Wala pa akong instances na gusto ko na talagang mag-quit. Hindi rin ako na-frustrate or something.

“Ano lang yan, eh, it’s a matter of… kailangan mo lang mag-rest minsan. Sasabihin mong magku-quit ka pag sobrang pagod na pagod ka na, yung burn out ka na.

“That’s why I see to it na once in a while nagha-hike ako, tapos magbe-vacation ka, you need to unwind, eh, para hindi dumating sa point na burned out ka na sa ginagawa mo na everyday routine.

“So kailangan ibi-break mo yung cyce. Na minsan, oo sige pahinga muna ako, hindi muna ako tatanggap para medyo maka-recharge ka at para ma-refresh ka ulit kasi mami-miss mo rin yang trabaho mo, eh,” lahad pa niya.

BASAHIN: Ara Mina at Dave Almarinez hopeful sa baby na ‘Made in Hungary’ 

Inamin din ni Ara na naranasan din niyang matarayan ng mga sikat na artista noong nagsisimula pa lang siya sa showbiz.

Pagre-recall ni Ara, “Alam naman ito ni Ate Osang (Rosanna Roces), before tinarayan niya ako noon sa set namin ng isang pelikula na bida siya at supporting lang ako. But you see, we’re good friends now.

“Tapos meron pang isang artista noon pero I will not mention na lang. Eh, kasi late ako noon kasi may lagare ako, so, ‘Ano, si Ara nasaan na?’ Eh pagdating ko umalis naman siya. Grabe rin kasi yung lagare ko nung time na yon. Hindi lang isang pelikula ang ginagawa ko noon. Uso yung tatlong movie yung ginagawa mo sa isang cycle.”

Ano nga ba ang secret ng kanyang staying power in the industry?

“I guess, sinamahan ko ng prayers na non-stop. Na parang, ‘i-guide mo ako, thank you for all the blessings at sa mga projects na binibigay mo.’ And lahat ng projects ng ginagawa ko binibigay ko yung best ko at saka nakiikisama ako nang maayos sa mga katrabaho ko, sa mga direktor, producers.

“I see to it na hindi ako pa-diva! Kasi kahit gaano ka kasikat pero may attitude ka hindi ka nila kukunin, eh. Magsasawa silang kunin ka kasi ang katwiran nila, ‘Ay, sasakit ang ulo mo diyan.’

“Kaya ako, I see to it talaga na grounded pa rin ako, tapos pinatunayan ko rin na marunong akong umarte at hindi lang pagpapaseksi noon ang kaya kong gawin. Tinawag din nila akong ham actress pero tinake ko siya as constructive criticism,” pagbabahagi pa ni Ara.

Meanwhile, may bagong business na itinayo ang mag-asawang Ara at Dave na tinawag na AForce Ventures. Si Dave ang founder ng kompanya at si Ara naman ang co-founder. Magiging operational na ang kanilang business sa darating na March 2023.