Ikinuwento ni Barbie Imperial kung ano ang totoong nangyari sa kamay ng nobyong si Diego Loyzaga na pinagmulan ng usap-usapan na nagkasakitan umano ang dalawa.

Sa eksklusibong panayam ng PUSH, sinabi ng aktres na naaksidente si Diego sa gym kaya ito mayroong sugat sa kamay, at hindi dahil nagka-pisikalan silang dalawa tulad ng mga nagsilabasang balita.

Dagdag pa ni Barbie, mismong siya ang nagdala kay Diego sa ospital matapos ang aksidente upang matahi ang sugat nito sa kamay.

View this post on Instagram

A post shared by BARBIE IMPERIAL (@msbarbieimperial)

“Nung time na na-aksidente si Diego, dapat uuwi na ako. Tapos tinawagan ko ‘yung kuya ko, sabi ko, hindi ako makakauwi kasi dinala ko sa hospital si Diego. Tapos sabi ng kuya ko, ‘Ano nangyari?’ ganito ganyan. Tapos nung okay na si Diego, pumunta siya dito sa house ko tapos pinakita niya kay kuya ‘yung tahi ng kamay niya,” aniya.

“Ang daming may alam kung ano ‘yung nangyari sa kamay ni Diego kasi may mga tao sa gym. Even si kuya Joe [Vargas], ‘yung part-owner ni Gerald Anderson sa Th3rd Floor, alam nila kung ano nangyari kay Diego. Kasi tinext pa nila si Diego kung anong nangyari, anong dumbbell, anong ganito,” sabi pa niya.

Kamakailan ay naging laman ng balita sina Barbie at Diego matapos pangalanan ng isang kontrobersyal na social media personality ang dalawa bilang celebrity couple na nagkaroon umano ng matinding away sa isang hotel sa Tagaytay.

Ayon kay Christian “Xian” Gaza, nag-check out umano ang magkasintahan sa nasabing hotel noong Nobyembre 1 na “sira-sira at basag-basag” ang buong kwarto matapos mag-away dahil sa isang babae.

Patunay umano sa tsismis ang isang retrato na ipinost ni Diego kung saan makikitang tila may sugat siya kamay, habang may pasa naman sa braso si Barbie.

View this post on Instagram

A post shared by Diego (@diegoloyzaga)

Nang hingan ng kanyang reaksyon tungkol sa akusayon ni Xian, sinabi ni Barbie: “Sa amin ni Diego, parang hindi kami [affected]. Siguro nagkaroon ng time na, ‘Bakit ganun siya? Bakit siya ganito? Bakit niya tayo sinisira?’ Pero na-realize namin na masaya kami, eh. So sisirain talaga. Kapag merong insecure na tao, sisirain talaga. And walang katotohanan kahit isa [doon sa] sinabi nung tao na ‘yun.

“Parang ang labo na ipapag-connect mo lang ‘yung photos tapos may ganito lang sa hand, may pasa. Bakit hindi ba ako pwedeng magkapasa sa ibang bagay? Bakit parang ‘yung boyfriend ko na sobrang mabuti, sobrang bait, sobrang tini-treat ako nang maayos, bakit siya ‘yung paghihinalaan na ginawa niya ‘yun sa akin? So kami ni Diego hindi na kami naapektuhan. Hindi namin hinayaan na maapektuhan kami. Kasi ‘yung totoo naman po, masaya kami eh, and ‘yung family namin sinu-support kami. So parang na-realize na lang namin na, ‘Eh. Kawawa naman ‘yung taong sumisira sa atin. Parang ganun kalungkot ‘yung buhay niya para sirain kami, para idamay kami sa lungkot ng buhay niya.’”

Pag-amin pa ni Barbie, naaawa siya kay Diego dahil sa kabila ng pagiging mabuting nobyo nito ay napapagbintangan pa umano siya ng kung anu-ano.

“Hindi talaga ako nagsasalita, like, kung about sa akin ‘yung issue. Pero kapag tungkol sa mga mahal ko, hindi ko talaga hinahayaan. Lalo na kapag wala namang ginagawang masama ‘yung tao,” aniya.

“Naawa ako kay Diego kasi lahat ginagawa niya para sa akin tapos siya pa ‘yung napagbintangan na may ginagawang mali sa akin. Na nag-cheat siya, ganito, ganyan. Parang hindi, eh. Hindi ganung klaseng tao si Diego. Hindi talaga.”

BASAHIN: Diego Loyzaga, pinabulaanan ang mga akusasyon ni Xian Gaza tungkol kay Barbie Imperial

Sa panayam, sinabi ni Barbie na imbis na galit ay awa ang nararamdaman nila ni Diego sa taong naninira sa kanila.

“Nakita ko na sobrang kawawa nung tao na ‘yun na naninira sa amin kasi ganun pala ‘yung nangyayari kapag sobrang lungkot mo sa buhay mo. Parang magta-try kang manira ng relasyon ng iba para maging masaya ka. Pero ‘yung totoo, sorry, pero hindi ka nakakatawa. Nakakaawa ka,” matapang na sabi ni Barbie.

Masaya rin umano sila ng nobyo na sa kabila ng isyung kinasangkutan nila ay marami pa rin ang nagpapakita ng suporta sa kanilang dalawa.

“Kami kasi nagbabasa rin kami ng comments. Hindi naman kami ganun na apektado sa comments, and ang dami naming nare-receive po na mga suporta ba sa mga tao lalo nung nangyari ‘yun. Parang, ‘Sana mas maging strong kayo.’ ‘Sana laban pa kayo. Hindi kami naniniwala.’ Mas marami ‘yung ganun eh, kesa sa mga [naniniwala]. Mas marami ‘yung suporta eh. Syempre para sa amin, kahit isa lang ‘yung nag-[message] sa amin ng ganun, malaking bagay na ‘yun kasi at least may isang tao na naniniwala,” ani Barbie.

Matatandaang Enero nitong taon nang inamin nina Barbie at Diego ang kanilang relasyon sa publiko.

Ito ay matapos na ma-link ang dalawa nang mag-comment si Diego sa isang bikini photo ni Barbie. Sa Magandang Buhay noong Nobyemre 2020, inamin ng aktres na nililigawan nga siya ng aktor.