• Home
  • Fresh Scoops
  • Nananatiling positibo ang pananaw ng aktres na si Pokwang sa kabila ng hiwalayan nila ng kanyang longtime partner na si Lee O’Brien.

Pokwang, naglabas ng pahayag ukol sa hiwalayan

Nananatiling positibo ang pananaw ng aktres na si Pokwang sa kabila ng hiwalayan nila ng kanyang longtime partner na si Lee O’Brien.

Pokwang, naglabas ng pahayag ukol sa hiwalayan-Leah Bueno
BY
Leah Bueno

Twitter: @Push_Alerts

FRESH SCOOPS

07/11/2022 11:41 AM
Pokwang, naglabas ng pahayag ukol sa hiwalayan
Photo credit to @itspokwang27 Instagram

Nananatiling positibo ang pananaw ng aktres na si Pokwang sa kabila ng hiwalayan nila ng kanyang longtime partner na si Lee O'Brien.

Sa Instagram, muling nagsalita si Pokwang ukol sa hiwalayan nila ng American partner na ama ng kanyang bunsong anak na si Malia.

"Yes it's been seven months since tapusin namin ni papang ang lahat, pero maayos at mapayapa, at bilang magkaibigan na lamang mas nagagampanan namin ang mga tungkulin bilang magulang ni Malia," ani Pokwang.

"Natapos man ito sa di inaasahang panahon hindi dito hihinto ang pagiging nanay ko sa mga anak ko. At mas lalo kong minahal ang mga biyayang sakin ay binigay ng Panginoon," sabi pa niya. "Ikaw aking nanay Gloria ang aking inspirasyon sa pagiging matatag at matibay na nanay. Salamat sa iyo at alam kong lagi kang nakagabay sa amin ng mga apo mo kaya ni minsan at kailan man di ka mawawaglit saking mga dasal."

Bukod sa kanyang namayapang ina ay may mensahe rin si Pokwang para sa mga kapwa niya single parents.

"Sa mga single parent na kagaya ko hindi karma ang natapos na pagmamahalan kundi mas pinapatatag ka at pinaghahanda ka sa mas magaganda at mas maraming biyaya. Hindi karma ang mabiyayaan ka ng mga anak na nagpapasaya at nagpapangiti sayo araw araw at dahilan ng pagsisikap mo sa buhay," aniya.

Samantala, ilan sa mga nagpahayag ng kanilang suporta para sa aktres ay sina Angelica Panganiban, Rabiya Mateo, Melai Cantiveros, Cherry Pie Picache, at Vina Morales.

Nito lamang Sabado, Hulyo 9, nang kinumpirma ni Pokwang ang hiwalayan nila ni Lee sa eksklusibong panayam ng PUSH.

"I’m okay, Mare. We’re okay. No third party involved and we’re both co-parenting kay Malia. Maayos naming tinapos ang lahat. Hindi kami pait-paitan," ani Pokwang. 

“In fact, welcome siya sa bahay. Every weekend ay magkakasama kami. Seven months of surviving and peace ‘ika nga."

READ: EXCLUSIVE: Pokwang sa hiwalayan nila ni Lee O’Brian: ‘Maayos naming tinapos ang lahat, hindi kami pait-paitan’

Mahigit pitong taon naging magkasintahan sina Pokwang at Lee bago ang kanilang hiwalayan.

Unang nagkakilala ang dalawa nang magkatrabaho sa TFC movie na Edsa Woolworth noong 2014.

Ayon kay Pokwang, may iba na ngayong tirahan si Lee dito sa Pilipinas at nalalapit na rin ang pag-alis nito pabalik ng Amerika.