• Home
  • Fresh Scoops
  • Inspirasyon rin ni Richard Gomez ang Sagip Pelikula ng ABS-CBN Film Restoration team sa kaniyang nais na isulong na programa.

Richard Gomez, nais isulong ang film archiving sa kongreso

Inspirasyon rin ni Richard Gomez ang Sagip Pelikula ng ABS-CBN Film Restoration team sa kaniyang nais na isulong na programa.

Richard Gomez, nais isulong ang film archiving sa kongreso-Kiko Escuadro
BY
Kiko Escuadro

Twitter: @Simplengbinata

FRESH SCOOPS

07/01/2022 06:31 PM
Richard Gomez, nais isulong ang film archiving sa kongreso

Matamis na tagumpay kung ilarawan ng actor-politician na si Richard Gomez ang kaniyang pagkapanalo sa 2022 national elections.

Si Richard ang newly elected congressman ng fourth district ng Leyte kung saan siya nanilbihan bilang isang Mayor ng Ormoc City, Leyte.

“Masarap ‘yung feeling kasi ibig sabihin, maganda ‘yung perfromance na ginawa namin,” tugon ni Richard sa PUSH at piling miyembro ng entertainment press sa naganap 2022 Piña Festival sa Ormoc City, Leyte. “It’s our second election na naka straight win kami dito,” sambit pa ni Goma.


Kasabay ng naging tagumpay ni Richard na masungkit ang bagong puwesto bilang Congressman, hindi maiaalis na naging sentro rin ng basher si Goma at kaniyang misis na si Lucy Torres-Gomez sa kanilang naging choice na sinuportahang presidentiable.

Pero ayon kay Goma, hindi sila nagpa-apekto dito. “Hindi. Nakita ko kasi na ganun talaga ang last election e. Kaya maaga pa lang sinuportahan ko na talaga si BBM. Sabi ko nga ‘wag niyo na kami i-bash kasi it’s an election exercise. Kung gusto niyo manalo ang kandidato niyo, ‘wag kami ang tirahin niyo at ikampanya niyo maigi ang presidentiable ninyo. Ang sa akin lang, ‘wag niyo kami awayin. Kasi kami isang boto lang naman ako. And with that, bumaba ang basher namin” paliwanag ni Goma.

At ngayong isa nang ganap na kongresista, bukod sa mga programang para sa fourth district ng Leyte, isa aniya sa nais tutukan ni Goma ang pagbabahagi ng kaniyang puso sa entertainment industry.

“Alam mo ang dami nating pelikula na hindi nai-store ng mabuti at nabubulok lang at inaamag,” tugon ng actor-politician sa usapin ng pagkakaroon ng bahagi ng gobyerno sa pelikulang Pilipino.

“It is very important through the funds coming from the national government na gumawa tayo ng isang film archive nang sa gayun, ma-restore natin ang mga film stuff kasi kung titignan mo example na lang ang mga pelikula ko, nasa Quiapo na lang ginagawang torotot e, so ‘yun talaga ang gusto ko palakasin,” ani Goma.

Bilang isang alagad ng entertainment, isa rin aniya sa naging inspirasyon ni Richard ang pag-restore at ang digitalization process ng ABS-CBN Sagip-Pelikula kung saan napapanood niyang muli ang kaniyang mga ginawang pelikula.

“Ang dami rin kasi karamihan na digitize na ng ABS-CBN e nare-remaster na ng ABS-CBN pero kung tatanugin siguro ‘yung mga pelikula namin ni Armida (Siguion Reyna) gusto ko rin sana makita ulit,” sambit ni Richard.

Sa bahagi rin ng panayam, napa balik-tanaw rin si Richard sa mga kasamahan sa industriya na ngayo’y National Artist ng Pilipinas na.

“I would say na isa ako sa masusuwerteng mga artista na nakagawa ng pelikula, kasama ang mahuhusay na mga direktor at mga naging national artist sina Ricky Lee, sina Tony Mabesa, ilang beses ko nakasama ‘yan, si Marilou Abaya.”

At ngayong level up ang kaniyang responsibility bilang fourth district representative ng Leyte at maraming oras na namamalagi sa Maynila, isa rin sa naging tanong ay kung posible rin ba siyang magbalik-pelikula.

“Siguro mahihirapan,” agarang tugon ni Goma. ”Pero puwedeng pag-isipan tulad noong ginawa namin ang Three Words to Forever ni Sharon (Cuneta), dito talaga sila nag-shoot mga 90 percent of the film dito lahat sa Ormoc. So sina Sharon, Kathryn (Bernardo), and the whole team they were here for about a month, at the same time, nakita rin ng tao na ‘uy maganda pala sa Ormoc,’” saad pa nito.

Dahil next level rin ang kaniyang responsibility as a Representative, hindi itinanggi ni Goma na malaking adjustment ito sa kaniyang career bilang isang politician.

“Kasi ‘yung trabaho ng Mayor, kailangan matigas ka, kailangan may political will ka e, at dapat may plano ka talaga like ako, mayroon akong 10 point agenda na dinadala ko. And this time siguro magiging malaking adjustment talaga kasi magka-iba ang trabaho namin (Lucy Torres) legislative sa kanya naman executive e,” ani Richard.

Mapapadalas man sa Maynila, isa lang ang sinigurado ni Goma na tuloy pa rin ang suportahan nila ng Misis na si Lucy na iniluklok naman ngayon bilang Mayor ng Ormoc City.

“I will definitely miss Ormoc, pero ang trabaho naman ng congress is to come home pa rin naman dito sa district, every week,” pahayag ni Richard.

2018 nang huling gumawa ng pelikula si Richard kung saan nakasama niyang muli si Sharon Cuneta at ang Kapamilya actress na si Kathryn Bernardo sa Three Words to Forever ng Star Cinema.