• Home
  • Fresh Scoops
  • Narinig na sa unang pagkakataon ni Chito Miranda ang liriko ng sikat na awiting ‘Harana.’

‘Kinilabutan ako’: Chito Miranda, namangha nang marinig ang nawawalang liriko ng ‘Harana’

Narinig na sa unang pagkakataon ni Chito Miranda ang liriko ng sikat na awiting ‘Harana.’

BY
PUSH TEAM

Twitter: @Push_Alerts

FRESH SCOOPS

06/01/2021 11:19 AM
‘Kinilabutan ako’: Chito Miranda, namangha nang marinig ang nawawalang liriko ng ‘Harana’
Photo Credit: @chitomirandajr Instagram

Makalipas ang halos tatlong dekada, ibinunyag ng kompositor ng sikat na awiting “Harana” ang mga orihinal na liriko ng nasabing awitin na hindi pa naririnig ng maraming tao. 

 

 

Sa episode ng programang Pamilya Talk ni Jing Castañeda, nagharap ang frontman ng Parokya Ni Edgar na si Chito Miranda at si Eric “Yappy” Yaptangco.

Dito, napag-usapan ang pinagmulan ng nasabing awitin na unang sinulat ni Yappy noong nag-aaral pa ito sa Ateneo de Manila University taong 1989. 

Pagbabahagi ni Yappy, ang nasabing awitin ay literal na ginagamit bilang pang-harana sa mga hinahangaan ng mga estudyante sa sikat na pamantasan. 

Ani Chito na ibinahagi ang tungkol sa tradisyon ng pagpasa sa kanta sa mga sumunod na taon, nagkaroon ng pagbabago sa himig ng awitin hanggang sa nawala ang isang saknong liriko ng kanta. 

READ: Chito Miranda shares lyric video of song written for wife Neri Naig

Naging parte ang “Harana” ng album na First Note ng kapwa Atenista ni Chito na si Tony Lambino noong 1992. Taong 1997 naman nang ilabas ng Parokya ni Edgar ang kanilang bersiyon ng nasabing awitin sa album nilang Buruguduystunstugudunstuy.

Isa sikat na OPM group na kapwa nabuo din sa Ateneo — ang Apo Hiking Society — ang ni-record din ang ang nasabing kanta ngunit base na sa kanta ng Parokya ni Edgar at hindi sa komposisyon ng orihinal na nagsulat nito. 

Humingi ng paumanhin si Chito kay Yappy dahil sa pagpasa umano ng pagkakamali nila sa ibang mang-aawit. 

“Sorry, ‘yung version namin, napasa na namin kung ano ‘yung mistake na nagawa namin,” saad ni Chito. 

Dagdag pa nito: “‘Yung mistake — iba na ‘yung chords namin, slightly different ‘yung melody from the original, and kulang kami ng isang stanza.” 

Pero ani Yappy, masaya siya sa kinalabasan ng kanta makalipas ang ilang dekada. 

“Chito, hindi siya mistake. Actually, natutuwa nga ako na 'pag naglabas ka ng komposisyon, may buhay na siya. May buhay na siyang sarili, may connection na siya sa iba-ibang tao,” aniya. 

Nang marinig sa unang pagkakataon orihinal komposisyon ni Yappy, hindi napigilan ni Chito ang kanyang galak. 

READ: Chito Miranda performs Parokya Ni Edgar songs for a cause

“Amazed na amazed ako kasi kumbaga, meron kang narinig na urban legend tapos after telling the story so many times na iyon na ‘yung truth na pinaniwalaan ng tao, maririnig mo ‘yung original version,” ani Chito. 

Dagdag pa niya: “I can hear the small differences, and it’s so interesting for me… Sorry, blown away lang ako.”

Nang marining ang nawawalang panghuling sakno, hindi napigilan ni Chito na kilabutan sa tuwa.

“Kinilabutan ako! Iyon ang hindi ko alam! Sobrang galing. Nakakakilabot ‘yung last part. Bakit hindi sa amin umabot ‘yun? It completes the story, ‘yung dulo,” ani Chito. 

Samantala, inamin naman nitong masaya siya na umabot sa kanila ang kanta na aniya’y nakatulong sa pagsikat nila bilang isang grupo. 

“We’re just so thankful na, by chance, umabot sa amin ‘yung song. Honestly, it’s a huge part of Parokya’s career… It’s our first number one hit, e, so ang laking bagay talaga. We’re just very thankful,” saad ni Chito. 

Panoorin ang video sa ibaba: 

Nabuo ang Parokya ni Edgar sa Ateneo de Manila University kung saan nag-aaral si Chito ng elementarya at hayskul. 

Kilala ang banda para sa mga awitin gaya ng "Your Song," "Halaga," "Gitara," "Pangarap Lang Kita," at "Buloy."