Direk Darryl Yap, nag-react sa pagbatikos ni Liza Soberano sa poster ng ‘Tililing’

May mensahe si Direk Darryl Yap para Kay Liza Soberano.

BY
Leo Bukas

Twitter: @leobukas

FRESH SCOOPS

02/08/2021 05:24 PM
Direk Darryl Yap, nag-react sa pagbatikos ni Liza Soberano sa poster ng ‘Tililing’

Sinisigurado ng Tililing director na si Darryl Yap na makakapagbigay ng liwanag at dagdag na kaalaman ang kanyang bagong pelikula tungkol sa mental health. 

Ito ang reaksyon ng director sa post ni Liza Soberano sa kanyang Twitter account habang ipinapakita ang poster ng Tililing na ani Liza ay “it’s a no for me.” Mukhang nabahala si Liza sa larawan at kung paano ito tila tinutukoy ang isyu ng mental health.


Ang Tililing ay produced ng Viva Films at Vincentiments. Bida rito sina Gina Pareño, Candy Pangilinan, Chad Kinis, Donnalyn Bartoleme at Baron Geisler.

Nagbigay din ng mensahe si Direk Darryl kay Liza at sinabing kaisa siya nito sa isinusulong na mental health advocacy ng aktres.

“Sa iyo Miss Liza Soberano,

“Ang iyong pag-asa na sana’y makapagbigay liwanag ang aming pelikula sa pagpapalawak ng kaalaman sa pangkalusugang pangkaisipan ay hindi masasayang, 

HINDI KA NAMIN BIBIGUIN,” simulang mensahe ng director ng Tililing kay Liza.

“Ang aking mga artista sa pelikulang ito ay nagdaan sa mga pagsubok na nagpatatag din sa kanilang kalusugang pangkaisipan. Sigurado kaming hindi nila tatanggapin ang isang proyektong ikapapahamak ng kanilang prinsipyo at pagkatao.

“Matatalino ang aking mga artista, at matapang ang kanilang director,” giit pa niya.

Malalaman din daw kapag napanood na ang kabuuan ng pelikula kung bakit Tililing ang naging title nito.

Lahad niya, “Kapag napanood niyo na po ang #Tililing ay mauunawaan ninyo bakit ito ang titulo, bakit nakalabas ang kanilang dila; at bakit namin tinitindigan ang kalidad at mensahe ng pelikula.

“Kaisa po ninyo kami sa inyong adbokasiya. 

“Maraming Salamat po.”

Sa hiwalay na Facebook post naman ni Baron, ay ibinahagi ng aktor na patuloy pa rin siyang nakikipaglaban sa mental health problem.

“Hindi siguro alam ng mga tao na I was once a PMHA Cebu warrior. I still battle with the sickness everyday and it's no joke to wake up and fight for your life EVERY SINGLE DAY.

“Funny because on Feb 14 me and my wife Jamie Marie Geisler will be going to Davao for a radio tour on mental health. Weird or swak at sakto lalabas din ang #Tililing #fightthestigma #CarryOn #YouAreNotAlone,” pahayag ni Baron.