• Home
  • Fresh Scoops
  • Allen Dizon calls his new character in ‘Walker’ as ‘evil personified.’

EXCLUSIVE: Allen Dizon unleashes his evil side in Joel Lamangan’s new film ‘Walker’

Allen Dizon calls his new character in ‘Walker’ as ‘evil personified.’

BY
Leo Bukas

Twitter: @leobukas

FRESH SCOOPS

11/07/2021 11:03 AM
EXCLUSIVE: Allen Dizon unleashes his evil side in Joel Lamangan’s new film ‘Walker’

Hall of famer awardee na sa Gawad Pasado ang multi-awarded actor at bida-kontrabida ng pelikulang Walker ni Direk Joel Lamangan.

Iginawad kay Allen ang Dambana Ng Kahusayan sa Pagganap dahil sa anim na beses niyang pagwawagi ng best actor (Pinakapasadong  Aktor) sa Gawad Pasado para sa mga pelikulang  pagganap sa mga pelikulang Lauriana, Magkakabaung, Iadya Mo Kami, Bomba, Alpha The Rights to Kill, at Mindanao.

Female counterpart naman ni Allen bilang Hall of Famer ng Gawad Pasado si Nora Aunor.


READ: Allen Dizon scores a double best actor win at Gawad Pasado Awards

Mayroon ng 45 acting awards si Allen. Eleven dito ay galing sa mga international award giving bodies. Gaano ba kaimportante sa kanya ang magkaroon ng mga acting awards?

“Importanteng makatanggap ng mga acting awards kasi parang validation yon ng pinagpaguran mo bilang aktor sa industriyang ito. Pero hindi awards ang motivation ko sa mga pelikulang ginagawa ko. Importante sa akin yung tinawag na sense of fulfillment, na masaya ako sa ibinigay ko sa bawat roles na na-assign sa akin,” maikling paliwang ni Allen sa PUSH.

Sa bagong pelikula ni Joel Lamangan ay muling matsa-challenge ang galing ni Allen bilang aktor. Ayon sa award-winning actor ito na raw ang pinakamasamang character na ginampanan niya.

“Challenging sa akin kasi yung character nitong Greg, eh, mabait sa asawa, pero may kabit, tapos tinitira pa yung kapatid ng kabit niya na may tama sa utak. So, hindi ba, parang walang konsiyensiya? Talagang demonyo siya, evil personified,” lahad ni Allen.

Sa totoong buhay ay aminado si Allen na meron din siyang tinatawag na “evil side.” Paano ba nati-trigger ang paglabas ng kanyang bad side?

Tugon ng aktor,  “Siyempre ayaw mo yung niloloko ka. Ayaw mo yung  ikaw totoong tao ka pero yung mga taong nakakasama mo hindi pala totoo, niloloko ka lang pala. Siguro yon lang, pero so far hindi pa naman ako dumating sa point na parang gusto kong pumatay ng tao… hindi pa do’n.”

READ: Allen Dizon faces his most difficult role to date in the film ‘AbeNida’

Confrontational din daw siya pero madali namang lumamig ang kanyang ulo.

“Kasi ano ako, eh, confrontational ako in a positive way, na parang gusto ko maayos lang. Gusto kong pag-usapan ang lahat ng bagay kasi naniniwala ako na hindi naman lahat ay puwedeng daanin sa init ng ulo lalo na kung mapapasama lang.

“Tinitimbang ko rin kasi ang lahat, eh. Hindi naman puwedeng sugurin mo yung tao, suntukin mo. Oo, mainitin ang ulo ko, mabilis mag-init ang ulo ko kahit konting ano lang, pero after a while, konting tubig lang, kong relaxation lang ng mga five minutes wala  na yon. Kumbaga tapos na.

“So kung ano yung nasabi ko, hihingi ako ng sorry, hihingi ako ng paumanhin kung may nasabi akong masama kasi tao lang tayo, eh,” paliwanag niya.

Samantala, ikinararangal naman ni Direk Joel Lamangan na muling makatrabaho si Allen sa Walker.

Ayon sa direktor, “Para sa akin, sa ngayon si Allen Dizon ang isa sa pinakamahusay na aktor ng ating panahon. Katunayan, napakarami niyang award, local and international sa pagiging mahusay na aktor.

“Sa aking pagtatrabaho sa kanya ay nakita ko ang dahilan ng mga award na ibinigay sa kanya. Nakita ko ang isang napaka-dedicated na aktor sa kanyang craft. Nakita ko kung paano siya mag-prepare sa kanyang gagawing role sa isang pelikula.

“Nakita ko kung gaano siya kaseryoso, nakita ko ang kakayahan niya bilang isang actor, nakita ko kung paano siya naging matagumpay sa pagbuo ng character na dapat niyang gawin sa pelikula.

“Nakita ko ang kanyang preparasyon, nakita ko ang kaseryosohan niya. Isa siyang natatanging actor ng ating panahon. Isang karangalan sa akin na makasama ka sa anumang proyekto.”

Anyway, kasama ni Allen sa Walker sina Sunshine Dizon, Rita Avila, Edgar Allan Guzman at marami pang iba. Bukod sa Walker ay katatapos din lang gawin ni Allen (kasama si Katrina Halili) ang Abe-Nida ng BG Productions na mula naman sa direksyon ni Louie Ignacio.