• Home
  • Fresh Scoops
  • Taong 2011 nang manalo si Angeline Quinto sa ‘Star Power’.

Angeline Quinto, ikinuwento ang highest at ang lowest points ng kanyang career

Taong 2011 nang manalo si Angeline Quinto sa ‘Star Power’.

BY
Leo Bukas

Twitter: @leobukas

FRESH SCOOPS

10/20/2021 06:03 PM
Angeline Quinto, ikinuwento ang highest at ang lowest points ng kanyang career
Photo credit @loveangelinequinto Instagram

Ngayong 2021 ang ika-10 taon sa showbiz industry ni Angeline Quinto. Taong 2011 nang tanghaling grand winner ng Star Power sa ABS-CBN si Angeline. Bago manalo rito, naging finalist din siya ng Star for a Night kung saan nakalaban niya sina Mark Bautista at Sarah Geronimo.

Sa 10 taon ni Angeline sa industriya, ano ba ang maikokonsider niyang highest point ng kanyang career?

“Siyempre, para sa akin, ang highest point ng career ko ay yung nakapag-concert po ako sa Araneta Coliseum,” tugon sa PUSH ni Angeline.  “First time kong nakapag-concert with Erik Santos.  Kasi bata pa lang ako Mama Leo, yon na yung gusto ko, eh.


“Pag sinabing Araneta Colisuem, di ba iba pag nakapag-show ka doon. Nakapag-show naman ako before doon pero bilang guest. Naging guest po ako ni Ms. Reg (Regine Velasquez) tsaka ni Sir Ogie (Alcasid), ganun, pero iba din po kasi talaga yung ikaw mismo yung may sariling show,” pagbabalik-tanaw ng singer-actress.

Angeline Quinto celebrates 10 years in showbiz with 10-part concert series at the newly-renovated MET Theater

Eh, ano naman yung maituturing niyang lowest point ng kanyang career sa 10 taon niya sa showbiz?

Kuwento ni Angeline sa PUSH,  “Ang masasabi ko naman pong lowest point ng career ko sa ten years ko sa industry Mama Leo, siyempre yung nagsara ang ABS-CBN, nung nag-shutdown ang ABS. Kasi parang do’n ako napaisip na parang anong mangyayari?”

Nag-alala raw talaga siya kung ano na ang mangyayari sa kanyang career at paano niya bubuhayin ang kanyang Mama Bob lalo pa nga’t nawalan ng prangkisa ang ABS-CBN.

“Normal na maisip mo yon bilang isang Kapamilya na, ‘Paano na ako ngayon? Ano nang magiging trabaho ko ngayong nagsara yung network ko? At saka yung unti-unti na maraming nawala, hindi lang po sa mga celebrities kundi sa mga katrabaho ko din po.

“Kumbaga, parang ang ABS-CBN kasi naging pangalawang tahanan ko na yan. Yan ang talagang tumanggap sa akin at diyan ko naranasang maging champion. Yan ang nagbigay sa akin umpisa ng pangarap ko. So, nung nag-shutdown ang ABS, ang una kong tanong sa sarili ko, ‘Paano na ang Mama Bob? Paano ko bubuhayin si Mama kung wala akong work?’” pahayag pa ni Angeline.

Angeline Quinto reveals she is ready to get married

Pero sa kabila ng nangyari sa ABS-CBN ay masuwerteng hindi raw naman siya nawawalan ng trabaho.

“Sa awa ng Diyos,  kahit naman hanggang ngayon na walang prangkisa ang ABS-CBN, eh, hindi naman po ako nawawalan ng trabaho. Kung tutuusin nga po Mama Leo, madadagdagan pa ulit yung work ko dahil meron kaming isang show na magbabalik na this year, ayoko po munang sabihin kung ano yon.

“Malaking bonus din itong concert na ginagawa ko, yung mga shows abroad bilang guest ni Ate Vice (Ganda), malaking bagay din dahil makakabalik din ako ng Amerika. So, sana mag-umpisa ulit kahit pakonti-konti po. Alam ko naman na babalik din sa normal ang lahat,” lahad ni Angeline.

Bukod sa pagiging singer ay isa ring aktres si Angeline. Taong 2012 nang sumabak si Angeline sa pag-arte  sa pelikulang Born to Love You katambal si Coco Martin. Matapos ang isang taon, bumida naman siya sa kanyang kauna-unahang primetime teleserye na Kahit Konting Pagtingin kung saan pinag-aagawan siya ng kanyang leading men na sina Sam Milby at Paulo Avelino.

Bilang isang artista, marami pa raw siyang gustong gawin kung mabibigyan ng pagkakataon. Kasama na raw dito ang pangarap niya na maging best actress. Bilang singer, gusto naman niyang maging concert producer.

“Alam n’yo, sa totoo lang, ewan ko ba, parang kahit ako din minsan nagugulat sa sarili ko kasi kung ako tatatanungin mo, siyempre hindi ako kuntento sa ganun, na paminsan-minsan lang ako gumagawa ng pelikula o teleserye.

“Kasi ang dami ko pang pangarap, eh. Pangarap kong maging best actress. Yan ang lagi kong sinasabi sa kanila na mabigyan lang ako ng pagkakataon tatrabahuhin ko talaga.

“Pagdating naman sa pagkanta, marami pa rin po talaga akong gustong gawin sa music ko siyempre bilang isang singer. Dream ko na makapag-produce ng iba’t ibang mga shows. Sana ako naman yung tutulong sa mga kabataan na may ganitong pangarap din po,” deklara sa PUSH ni Angeline.

Magsasagawa ng 10-part concert series si Angeline na pinamagatang 10Q bilang pagdiriwang ng kanyang Ika-10 taon sa industriya. Gaganapin ito sa newly renovated MET Theater. Si Angeline ang kauna-unahang music artist na magco-concert dito.

Mabibili ang tickets para sa 10Q concert sa www.ktx.ph. na mapapanood exclusively sa KTX, iWantTFC, and TFC IPTV sa  October 29 at 30; November 26 at 27; December 25 at 26; January 28 at 29; at February 18 at 19.