• Home
  • Fresh Scoops
  • Inamin ng komedyante at host na si Vice Ganda na naiisip na niyang magpakasal at magkaroon ng sariling pamilya.

Vice Ganda, handa na nga bang magpakasal at magkapamilya?

Inamin ng komedyante at host na si Vice Ganda na naiisip na niyang magpakasal at magkaroon ng sariling pamilya.

BY
Leah Bueno

Twitter: @Push_Alerts

FRESH SCOOPS

10/01/2021 09:18 AM
Vice Ganda, handa na nga bang magpakasal at magkapamilya?
Photo Credit: @praybeytbenjamin Instagram

"Kino-consider ko na talaga siya."

Ito ang naging pag-amin ni Vice Ganda nang ibahagi niya ang kanyang saloobin tungkol sa pagpapakasal at pagkakaroon ng pamilya sa podcast ng kapwa It's Showtime hosts na sina Jugs Jugueta at Teddy Corpuz.

 


 

Sa kaniyang panayam sa “Soundtrip with Jugs & Teddy”, nagkwento ang tinaguriang Unkabogable Star tungkol sa mga naging karanasan niya sa pag-ibig na minsan ay nagpaniwala sa kanya na hindi na siya makakahanap ng taong para sa kanya.

Ayon kay Vice, mas lalo umano siyang nakaramdam nalungkot noong sunod sunod na nagpakasal ang kanyang mga kasamahan sa It's Showtime.

"Naging trauma sa akin 'yung kasal niyo," pag-amin niya. "[Nung time na 'yun], unti-unti nang nagsi-sink in sa 'kin na impossible yata. Pero mayroon pang manipis na manipis na hibla ng pag-asa na 'di ko talaga binibitawan, kinakapitan ko talaga siya, 'Hindi, meron 'to.' Antayin ko. Pero unti unti na talaga akong pinapasok na... 'Uy, maiiwan talaga ako dito." 

Patuloy niya: "Tapos sabi ko nga kay Anne (Curtis) 'di ba, nag-iiba iba na kayo ng titulo, 'di ba. Hindi ka na performer lang, hindi ka na actress lang, naging housewife ka na. Tapos bukod sa housewife, naging mother ka na. Ako hindi nagbabago 'yung title ko. Comedian ako forever."

Ani Vice, nais din umano niya na magbago ang kanyang titulo sa "lover, partner, at parent."

"Wow, talaga? Totoo?" tanong ni Jugs.

“Yeah. Kino-consider ko na talaga siya. Gusto ko na maging parent. Kasi dati, sabi ko, 'No, not my thing.' Hindi ko kayang mag-alaga ng bata. Tapos eventually nag-grow sa akin yung pagkagusto ko sa bata dahil sa Showtime, dahil sa Star Cinema, sa mga ginagawa kong pelikula na lahat ang target ko, para ito sa mga bata,” sagot ni Vice.

Dagdag pa ni Vice, natutuwa umano siya sa mga bata at pakiramdam niya ay kaya na niyang bumuhay nito.

"Feeling ko I can be a great parent. Nararamdaman ko na sa sarili ko 'yun," aniya. 

Ayon pa sa komedyante, hindi rin umano niya inaahasan na magbabago ang isip niya tungkol sa pag-aanak.

"Nagbabago rin pala talaga 'yung tao ano? Kahit naman kasal, eh. 'Di ba sabi ko, 'No, not for me.' If my friends, if some people in my community want to do it, I support them. Pero ako, not my thing. Hindi ko nakikita 'yung sarili ko," aniya.

Ngunit pag-amin ni Vice, na ngayon ay nasa masayang relasyon kasama si Ion Perez, nae-excite na rin umano siya sa ideya na maaari na rin siyang magpakasal sa hinaharap.  

“Nae-excite na rin sa konsepto ng... oh my God one of these days baka magpakasal ako. Nae-excite din ako. Lalo na 'pag nararamdaman ko na ang daming nagsu-support sa love namin ni Ion sa isa't isa. Kinikilig ako,” sabi niya.

READ: Are Vice Ganda and Ion Perez now married? Comedian sets the record straight

Sa podcast, masaya rin na nagkwento si Vice kung paano nagsimula ang love story nila ng kanyang nobyo.

Pag-amin niya, bagamat aminadong naku-cute-an siya kay Ion, noong una ay hindi umano niya gusto ito. 

"Pero ang pinaka-na-in love talaga ako sa kanya, ang bait talaga. 'Yung buong circle ko, gusto na si Ion. Hindi ko pa gusto si Ion talaga, gusto na siya nung buong circle ko. May dine-date ako that time na gusto ko, sinasabi ng mga circle ko na, ''Wag na 'yan, day,'" kwento niya.

Patuloy pa ni Vice, noong una ay wala umano siyang nararamdamang "spark" sa gitna nila ni Ion.

"Pero nagagwapuhan ako sa kanya. Alam mo ‘yung nilalandi ko siya kasi siyempre malandi ako ‘di ba, pero hindi malalim. Hindi agad. Slow burn kumbaga, tapos ang ganda nung pumutok," aniya.

Matapos nito ay ikinwento ni Vice ang sandali na nagbago ang pagtingin niya kay Ion.

“Pumunta kami ng Hong Kong, gumimik kami doon nina Zeus (Collins)... Nung nagkalasingan na, nag-confess na si Ion na parang nahu-hurt siya sa ginagawa ko sa kanya. Na parang, ‘Ba't ganun si Meme, parang 'di ko alam kung trip niya 'ko o 'di niya ko trip... parang pinaglalaruan niya ko.’ Tapos na-hurt siya. 'Hindi kasi ako ganun eh. Ayaw ko nang ganun. Kung friends lang, eh di friends lang. Pero sana 'yung malinaw na kung ano ba talaga kami.' Kasi naha-hurt daw kasi siya,” kwento niya. 

Dito umano niya napagtanto kung gaano kabait na tao si Ion.

"Hindi 'yan mahu-hurt kung hindi 'yan mabait. Kung tarantadong lalaki lang 'yan, eh 'di makipaglaruan lang din siya sa 'yo 'di ba?" aniya.

Patuloy pa niya: "Tapos nung na-hurt ako nung isa kong [dine-date dati], sabi ko, 'Ay, hindi ko 'to deserve.' Ang deserve ko talaga, ‘yung matino, ‘yung mabait. Para naman akong tanga... dasal ako nang dasal sa Diyos. ‘Lord, bigyan mo naman ako ng mamahalin, bigyan mo naman ako ng magmamahal sa ‘kin,’ pero pinipili ko naman ‘yung hindi ako mahal. ‘Yung ‘di naman mabuti sa akin. Tapos ito, ‘yung mabuti nasa harapan ko tapos hindi ko naman pinapansin. Ako rin ang may problema 'di ba."

 

 

Sabi pa ng komedyante, mismong ang pagiging mabuting tao at totoo ni Ion ang naging dahilan kung bakit pinili niyang huwag ilihim ang kanilang relasyon sa publiko kahit pa pinagbawalan umano siya ng kanyang management noong una.

"“Yan ‘yung nangyayari sa akin dati, ‘yung mahal ko ‘yung tao tapos nasasaktan ako kasi hindi niya ako kayang ipagmalaki. 'Yun 'yung pain ko noon pa, tapos ngayon ginagawa ko kay Ion,” aniya.

"So sabi ko, 'Ay hindi.' Kung ano ‘yung deserve niya, ‘yun ang ibibigay ko sa kanya. Kaya dedma kahit ipatawag ako ng management, papagalitan na naman ako. Sasabihin ko na talaga jowa ko si Ion.”

Itong darating na Oktrubre ay nakatakdang ipagdiwang ng dalawa ang kanilang ikatlong taon bilang magkasintahan.

Matatandaang taong 2019 nang aminin ni Vice ang relasyon nila ni Ion sa ika-10 anibersaryo ng It's Showtime .