• Home
  • Fresh Scoops
  • Ayon sa magkapatid na Matet at Ian de Leon, hindi binabase sa photos sa social media kung gaano nila kadalas makasama ang ina na si Nora Aunor.

Matet at Ian de Leon, muling nagbigay ng reaksyon sa bintang na pinababayaan nila ang inang si Nora Aunor

Ayon sa magkapatid na Matet at Ian de Leon, hindi binabase sa photos sa social media kung gaano nila kadalas makasama ang ina na si Nora Aunor.

BY
Leo Bukas

Twitter: @leobukas

FRESH SCOOPS

09/05/2020 03:46 PM
Matet at Ian de Leon, muling nagbigay ng reaksyon sa bintang na pinababayaan nila ang inang si Nora Aunor
Photo credit: @matet___ IG

Muling nagbigay ng reaksyon ang magkapatid na Matet at Ian de Leon sa ayaw mamatay-matay na isyung diumano ay pinababayaan nila ang inang si Nora Aunor.

Ginawa ng dalawa ang paglilinaw sa live stream ni Ian sa kanyang You Tube channel ilang araw na ang nakakaraan. Kay Ian nagsimula ang paglilinaw at ginawa raw niya ito para tuldukan na ang isyu sa kanilang mag-ina.

Aniya, “Unang-una, mahal na mahal namin ang mommy namin, walang makakadurog nu’n. Kung kami magkakasama, iba ‘yung samahan namin pag magkasama kami ni mommy… iba.”


Nagbigay din ng reaksyon ang aktor sa puna ng fans ni Nora kung bakit wala silang pino-post na larawan kasama ang inang Superstar.

“Isyu yung parang pinabayaan natin si Mommy. Kasi hindi nila nakikitang kasama yung sa mga pictures, mga ganu’n,” sabi pa ni Ian.

Wika naman ni Matet, “Sila ang kumukuha ng litrato?” na sinundan ni Ian ng, “Oo nga, ‘yun nga. As in sobrang… Alam mo, sasalo ako ng bala para sa mommy namin.”

Aminado rin si Ian na marami talagang hinarap na isyu ang kanilang pamilya na sa halip na makatulong ay mas nakakagulo pa sa kanilang mag-iina.

“Ang gusto ko lang ipaalam sa ating mga manonood—kami, as mom’s children, ang respeto namin kay Mommy, higit pa sa buong mundo. Higit pa sa galaxy. Higit pa sa lahat ng nakikita n’yo rito sa universe,” pagdidiin niya.

Ayon naman kay Matet, wala na siyang magagawa kung ayaw silang paniwalaan ng ibang tao.

“Wala na kaming magagawa do’n. Pero do’n sa mga naniniwala na mga Noranian sa amin, nagpapasalamat kami. Kasi sila naman din yung talagang nakakakilala sa amin.

“Pero ‘yung mga nakakarinig lang ng tsismax, ganu’n, wala kaming nagagawa kung ‘di kayo naniniwala. So, kung pwede, kung nanonood kayo, tigilan n’yo na ang kako-comment sa IG ng Ate (Lotlot de Leon) ko,” lahad pa niya.

Hindi raw kasi talaga mahilig pumatol si Lotlot sa mga bashers na kabaligtaran niya dahil siya raw ay pumapatol talaga kapag may nababasa siyang hindi maganda.

Regarding naman sa picture ng kanilang ina na kasama sila, aniya, hindi raw talaga mahilig magpa-picture ang award winning actress na kasama sila.

“Believe it or not, we are always together, alam mo ‘yun, kahit magkalalayo kami, we are always in touch, we are always communicating,” deklara ni Ian.

Iginiit pa nila na masakit para sa kanilang magkakapatid ang bintang ng mga tao na mga pabaya silang anak ni Nora.

“’Yon lang guys, yon yung mga gusto ko lang i-share na nasa saloobin ko, nasa saloobin namin ng mga kapatid ko. Si Mommy, may edad na, pagod na rin sa mga issue. Ang gusto lang niya, maging peaceful kaming family. Gusto lang niya, happy, simple.

“Actually, mahiyain talaga si mommy, mahiyain talaga siyang tao. And kung ano yung hindi ninyo nakikita na samahan namin, eh, sa amin na lang po yun,” huling pahayag ni Ian sa kanyang vlog.