Hindi napigilan ng dating child star na si Xyriel Manabat na maglabas ng kanyang saloobin kaugnay sa mga pambabastos ng ilang netizens sa mga larawang ibinahagi niya sa social media nitong nakaraang linggo.
Mariing sinabi ni Xyriel na taliwas sa marahil iniisip ng mga nagkokomento sa kanyang larawan, hindi niya ikinatutuwa ang mga nababasa niyang komento sa social media tungkol sa kanyang dibdib.
LOOK: ‘Dalaga na si Momay’: Xyriel Manabat’s latest photo charms netizens
Ani Xyriel, hindi kailanman dapat kunsitihin ang ganoong pag-uugali lalo pa’t pambabatos ito o sexual harassment.
"Hindi po ako napa-flatter sa ibang comments kasi 'yung iba po below the belt. Sana po alam nila at aware po ‘yung mga tao na sexual harassment is never, never okay. Hindi po siya fine," ani Xyriel.
Nag-iwan naman ng mensahe si Xyriel sa mga taong patuloy na nambabastos sa social media lalo na sa mga mga menor de edad gaya niya.
"Sa mga nakaka-experience po lalo na po kapag minor, siyempre hindi naman po sila sanay sa ganoon. Minor man, girls, boys, anumang age, anumang gender or anuman ang suot sana po walang ganoon,” aniya.
Dagdag pa niya: “Never po siyang nakakatulong. Lalo na po sa ganitong may pandemic na marami pong pinagdadaanan na mental health na problems. Huwag na pong sumabay. Respect na lang po.”
Sambit naman ng ina ni Xyriel na nagpakita sa nasabing video, wala na magagawa dahil biniyayaan sila ng malaking dibdib.
"Wala na tayong magagawa, asset na natin ito," saad ng ina ni Xyriel.
Panoorin ang panayam ni Xyriel sa dating “Push Now Na” host na si Darla Sauler sa ibaba:
Ngayong 16 anyos na siya, inamin naman ni Xyriel bagama’t wala pa siyang kasintahan, mayroon na siyang mga itinuturing na crush.
"May mga crush po ako. May crush din po ako sa totoong buhay. Normal naman po siguro 'yon.”
Huling napanood sa top-rating na teleserye na Wildflower si Xyriel. At aniya, napagtuunan niya ng pansin ang kanyang pag-aaral simula nang huminto siya sa pag-arte.
"Simula po noong nag-stop ako sa Wildflower hanggang ngayon ay talagang sobrang focus lang po ako sa personal life and studies, sa family and friends. Nag-e-enjoy po ako na ganito po, wala po gaanong iniisip, walang kasabay 'yung studies,” ani Xyriel.
READ: Xyriel Manabat graduates from high school
Unang nakilala si Xyriel sa Star Circle Quest. Lumabas ito sa iba’t-ibang teleserye ng Kapamilya network gaya ng Agua Bendita, Momay, at 100 Days To Heaven.