Matapos ang mahigit tatlong buwan, muling nagkasama ang aktres na si Heart Evangelista at ang kanyang asawang si Chiz Escudero.
Sa post ng dating Kapamilya star sa Instagram, ikinatuwa niya ang muling pagsasama nila ng kanyang mister matapos magkahiwalay nang higit sa 100 araw dahil sa quarantine.
“At long last!” ani Heart sa caption.
Mahigit tatlong buwan hindi nagkasama sina Heart at Chiz matapos isailalim ni President Rodrigo Duterte ang bansa sa enhanced community quarantine (ECQ) noong Marso upang pigilan ang paglaganap ng novel coronavirus.
Si Heart ay nanatili sa Manila, samantalang si Chiz ay lumipad pa-Sorsogon upang ipatupad ang quarantine guidelines sa kanyang nasasakupan bilang governor ng nasabing probinsya.
Mahigit limang taon nang kasal sina Heart at Chiz.
Noong Pebrero, bago ipinatupad ang COVID-19 lockdown, ginunita ng dalawa ang kanilang fifth anniversary bilang mag-asawa.