• Home
  • Fresh Scoops
  • Nakapila na ang mga pelikulang plano i-produce ng concert producer turned movie producer na si Joed Serrano.

Concert producer Joed Serrano explains why he decided to start producing movies 

Nakapila na ang mga pelikulang plano i-produce ng concert producer turned movie producer na si Joed Serrano.

BY
Kiko Escuadro

Twitter: @Simplengbinata

FRESH SCOOPS

12/20/2020 04:24 PM
Concert producer Joed Serrano explains why he decided to start producing movies 

Back to business ngayon ang concert producer na si Joed Serrano bilang isang movie producer.

Sa panayam ng PUSH sa official media launch ng kaniyang first produced film na Anak Ng Macho Dancer, ikinuwento ni Joed ang isa sa naging rason niya kung bakit niya ngayon sinubukan ang pag produce ng pelikula.

“Kasi ‘yung live concerts, lahat ng concert na nabinbin namin this year (2020) next year (2021) ipapalabas,” tugon ni Joed sa panayam.


Matatandaan na isa ang concert scene at live events ang labis na naapektuhan ng pandemya dala ng COVID-19.

Si Joed ang isa sa producer ng international performers tulad na lang ng The Jonas Brothers, Josh Groban at ang one night only concert ni Celine Dion sa Manila.

Isa sana sa major project ni Joed ngayong 2020 ang two night sold out concert ng American-Canadian singer songwriter na si Alanis Morissette na isa sa mga concerts na na postpone dahil na rin sa lockdown protocols sa iba’t ibang bansa.

Ayon sa producer: “Hindi naman kami pwede mag cancel kasi i-forfeit ng artist ‘yung binayad namin so we just have to wait,” aniya pa sa panayam.

Sundot pa niya: “Ngayon kung maghihintay ka at hindi ka gagawa ng paraan, patuloy kang malulugi kasi tulog ang pera namin doon.”

Sa usapin ng negosyo isa ang movie producing sa nakitang avenue ni Joed upang makapag provide na rin ng trabaho at kita sa mga apektadong mangagawa ng live events at movie workers dahil na rin sa limitasyon at krisis na dala ng COVID-19.

“So you have to come out from the box. Mag isip ka for example ang concert is one million dollars, fifty million pesos ‘yun, e kung makakapag produce ka naman ng five million pesos, e may venue ang movies kaysa sa concert. Kasi ang movies, pwede streaming, sa concert hindi, kailangan mo talaga mapanood ang artist so dito muna tayo, may nagagawa, may natutulungan tayo,” paliwanag ni Joed.

Binigyang paliwanag rin ng concert turned movie producer na patuloy pa rin siyang mag produce ng international acts dito sa Pilipinas at tuloy pa rin ang mga naudlot na concert sa susunod na taon.

“Hindi naman lugi. Katulad nang kay Alanis Morissette sold out siya ng April 6 and 7 pero nung na re-sched siya next year of December 7 and 8. So ang tagal na tulog ‘yung pera. Alam naman namin na kikita kami, kaya lang kailangan mo gumawa ng paraan,” pahayag pa niya.

Ang Anak ng Macho Dancer ay sa direksyon ni Joel Lamangan at introducing Miko Pasamonte, Charles Nathan, Mhack Morales, Ricky Gumera, and Sean De Guzman.

Bahagi rin ng pelikula sina Jaclyn Jose, Jay Manalo, Emilio Garcia, Rosanna Roces and Allan Paule.

Mapapanood ang Anak Ng Macho Dancer sa unang bahagi ng 2021.