Matapos ang naganap na special screening ng pelikulang The Hows Of Us sa Jakarta, Indonesia, lumipad agad sina Kathryn Bernardo at Daniel Padilla sa Ho Chi Minh City, Vietnam para sa pagpapatuloy ng international screenings ng kanilang pelikula.
Dito, tatlong sinehan sa BHD Cinemas ang napuno ng mga supporters ng dalawang Kapamilya stars sa Vietnam.
Hindi naman nakapagpigil ang fans na magbigay mensahe matapos mapanuod ang pelikula.
Bago pa man ang naging pagbisita nina Kathryn at Daniel sa Ho Chi Minh City, una nang binigyang pagkilala ang dalawa bilang Favorite Foreign TV Actress and Actor sa Blue Star Award Face of the Year Awards ng Vietnam.
Kaya naman, hindi na din pinalagpas ng kanilang fans sa Vietnam ang pagkakataon na mapanuod ang pelikula kasama ang kanilang idolo.
Matapos ang sunod-sunod na international screenings na dinaluhan ng KathNiel, inaasahan na mas tataas pa ang kita ng pelikula na lagpas na ngayon sa P600 milyon.