Kahapon, Agosot 28, sa grand opening ng kaniyang bagong business partnership na Nail Lounge By: Asia’s sa Riverside Arcade, Pasig, ibinahagi ng ‘Dental Diva’ Kakai Bautista ang tuwa at pasasalamat niya sa mga proyekto sa mga nakaraang taon at sinabing nakapagsimula na siya ng investments. Bukod sa kakabukas na nail spa, nakabili na rin si Kakai ng lupa na pagtatayuan niya ng sariling bahay.
“Thank you Lord, kasi hindi ko ine-expect na matatapos agad iyon (lupa). Siyempre, tayo (mga artista), hindi (naman) tayo stable sa pag-aartista, ‘di ba? Hindi natin sure kung lulubog ba ang bituin o mas tataas pa. So hangga’t kaya pa, hangga’t mainit pa ang katawan, invest lang nang invest.”
“At thank you sa maraming pagkakataon, maraming pelikula at mga shows. Mostly kasi ng ginawa ko from past years, puro Star Cinema na movies at sunud-sunod din. So malaking tulong ‘yun para sa kin.”
“Nagpapasalamat ako lalo na sa ABS-CBN kasi grabe din ang mga opportunities na binigay nila sa akin,” sabi ni Kakai, na magse-celebrate ng 40th birthday sa darating na Linggo.
Sa ibang balita, bibida si Kakai sa isang comedy-superhero movie na Wonder Bra. Kasama si Myrtle Sarrosa, ang pelikula ay mapapanuod sa September 12. Ito ay mula sa direksyon ni Joven Tan.
Ayon kay Kakai, masaya siya na sunud-sunod na mga magagandang pelikulang Pilipino ang pinapalabas ngayon sa mga sinehan.
“Ang saya ng industriya ng pelikula kasi bumabalik ulit ‘yung hype na gumagawa tayo ng mga pelikula na talagang Pinoy. Ang saya na sunud-sunod tapos lahat quality film, lahat masaya, iba-iba ang genre, iba-iba ang tema,” dagdag ni Kakai.