• Home
  • Fresh Scoops
  • Hindi na daw alam ni Jerome Ponce kung ilan na ang kanyang mga kapatid sa labas.

EXCLUSIVE: Jerome Ponce, walang isyu sa mga half-siblings

Hindi na daw alam ni Jerome Ponce kung ilan na ang kanyang mga kapatid sa labas.

BY
Leo Bukas

Twitter: @leobukas

FRESH SCOOPS

09/27/2017 09:19 AM
EXCLUSIVE: Jerome Ponce, walang isyu sa mga half-siblings

 

Hindi problema kay Jerome Ponce, isa sa mga bida sa bagong series ng ABS-CBN na The Good Son, kung marami man siyang mga kapatid sa labas. Tanggap daw niya ang mga ito at hindi ikinakahiya.

Aniya, “Bakit ko naman ikakahiya, eh, mga kapatid ko rin yung mga yon, iba-iba nga lang kami ng nanay pero iisa ang tatay namin.”


Nakikita naman daw niya paminsan-minsan ang mga half-siblings niya kapag may okasyon o gathering.

“Yung iba naman nasa poder ni Papa, so, nakikita ko sila. Ang ku-cute at ang gugwapo rin. Puwedeng artista,” pagmamalaki pa niya.

Si Jerome ay anak sa unang pamilyang tatay niya. Lima silang magkakapatid. May apat siyang kapatid sa isang kinakasama ng tatay niya at meron pang dalawa do’n naman sa isa pa. Meron din daw apat pang puro panganay naman ang tatay niya sa iba’t ibang babae.

“Honestly, hindi nga ako sure kung ilan na talaga kami, eh,” natatawa niyang pahayag. “Basta, maraming anak si Papa. Yung iba don, aaminin ko, hindi ko na rin kilala.

“Pero wala kang magagawa, eh. Hindi naman kasalanan ‘yun, eh. Pagmamahal ‘yung nangyari, eh. Hindi ko naman masisisi ang tatay ko sa ginawa niya. That’s life.

“Kailangan ko ring mahalin, tanggapin kung ano ang kaya kong i-provide pero I have this bias, hindi naman biased, pero inuuna ko muna ‘yung talagang mga kapatid ko dahil kami mismo, watak-watak pa, hirap pa,” paliwanag pa ni Jerome.

Eh, paano siya naka-relate sa role niya bilang Enzo sa The Good Son?

“Hindi nga ako masyadong maka-relate, eh. Kasi sa TGS, galit ako sa mga kapatid ko sa labas, pero sa totoong buhay, wala naman talagang isyu. Ang ginagawa ko na lang, ipinapasok ko si Enzo sa sarili ko. Hayun, lumalabas naman, lumalabas pati yung galit,” kuwento niya.

Kasama ni Jerome sa The Good Son sina Albert Martinez at Eula Valdez na gumaganap na kanyang mga magulang, Joshua Garcia, McCoy de Leon, Loisa Andalio, Elisse Joson, John Estrada, at Liza Lorena.