Matapos purihin ni Robin Padilla ang Cinemalaya film entry na Ang Pamilyang Hindi Lumuluha kung saan bida si Sharon Cuneta, nagpasalamat naman ang aktres sa action star dahil naging mabuting kaibigan niya ito.
“Isa sa pinakamatalik kong kaibigan na lagi kong mamahalin, at alam kong hanggang sa huling hininga mo mamahalin ako ... Maraming salamat, Robin ko,” ani Megastar sa kanyang social media post.
Inalala rin niya ang mga panahon kung saan hindi siya kinalimutan nito kahit sila ay hindi na magkasintahan. Nagkaroon ng tatlong pelikula ang dalawa at naging magkarelasyon din sa totoong buhay.
“Hanggang sa nabilanggo ka, sa sulat mo sa akin, sa ilang beses sinubok mong bumalik sa akin, sa tattoo mo (huwag mong mabura-bura yan. Di nila alam ang pinagdaanan natin baka dumanak ng dugo!)... nung namatay si Mommy ko, Ikaw lang ang nagpunta ng 2 beses. Iba nagtext lang kahit pa ang laking parte nila ng buhay ko... masaya ako at tahimik na ang buhay mo ngayon... na maligaya ka na at nandyan ka pa rin para sa akin...[sic],” post pa ni Sharon.