Dick Israel: ‘I’m surprised maraming taong nagmamahal pa sa akin’

Who is Dick Israel as an actor and as a family man?

BY
Cristina Malonzo-Balane

Follow me @cristinatampepe

FRESH SCOOPS

07/11/2016 02:48 AM
Dick Israel: ‘I’m surprised maraming taong nagmamahal pa sa akin’
071116-DickIsrael_PUSH.jpgSa ulat sa Rated K, tampok ang interview ni Korina Sanchez sa beteranong aktor na si Dick Israel na kamakailan lang ay nasunugan ng tahanan sa Caloocan City. Kabilang ang pamilya ni Dick sa 40 pamilya na nawalan ng tahanan. 

Naging viral din ang litrato ng 68-year-old na si Dick na ngayon ay ibang-iba na ang hitsura. Kilala si Dick bilang isang palabiro at matikas na kontrabida, pero ngayon ay bakas ang pagtanda at kahirapan sa kanyang mukha. Pero ani Dick sa mga naninibago sa kanya, “This is me.” 

Hindi nawala ang sense of humor ni Dick sa harap ng pangyayari, “Good or bad, it’s still publicity,” sabi ng aktor. 

Pero sa likod ng kanyang pagbibiro, nagkwento naman ang anak ni Dick na si Essex na, “Nakita namin sa mukha niya yung lungkot kasi yung pinundar niya wala na.” 


Ang totoong pangalan ni Dick ay Ricardo Michaca at kilala siya bilang magaling na kontrabida. Noong 1978 ay nakuha niya ang award bilang Best Supporting Actor para sa pelikulang Hindi Sa Iyo Ang Mundo Baby Porcuna. Nagkaroon din siya ng pangalawang award noong 1988 para sa pelikulang Patrol Man. 

Kabilang na si Dick sa mahigit 200 pelikula at kabi-kabilang paganap sa teleserye at drama sa telebisyon bago siya ma-stroke noong 2010. 

Kasabay nito ang pagtanggap muli sa kanya ng kanyang unang pamilya at asawang si Marilyn. Bago pa man siya maging artista, pinakasalan niya si Marilyn at nagkaroon sila ng apat na anak. Sa kanila umikot ang buhay ni Dick bago siya nasilaw sa kinang ng kasikatan at sila ay magkahiwalay. 

Bakit nga ba tinanggap siyang muli ni Marlyn? 

“Nang makita ko siya naawa ako sa kanya, hindi na niya magagawa yung mga dati niyang ginagawa. Tinitiis ko lahat yung mga kasungitan niya kasi siguro nade-depress lang siya kasi may sakit siya,” paliwanag niya. 

Malaki naman ang pasasalamat ni Dick sa kanyang asawa, “Yes, I’m very pleased na she never left me.” 

Nang tanungin kung may pinagsisihan siya, umiling ang aktor. Nang tanungin siya kung bakit ang sagot niya ay, “Sumaya naman sila.” 

Saan naman kaya napunta ang perang kinita ni Dick sa pag-aartista? Ayon kay Dick, “Binilhan ko ng bahay, yung wife ko at saka mga anak ko… I’m what they would call a good provider.” 


Makalipas ang tatlong taon mula ng ma-stroke si Dick, nagpursige si Dick na gumaling at makabalik sa industriya at muli siyang napanuod sa mga pelikula ni Chito Rono na Boy Golden at Badil

Kaya naman laking gulat ng lahat ng makita ang litrato ni Dick sa social media nitong July 3, 2016. Humihingi ito ng tulong dahil sa pagkatupok ng kanyang bahay sa sunog. Agad naman ang pagbuhos ng tulong sa aktor at sa pamilya nito. 

Bukod sa wheel chair at pansamantalang matutuluyan na bigay ng Rated K, nagsama-sama rin ang mga kaibigan ni Dick sa industriya para muling maipagawa ang nasunog na bahay ni Dick. Pinangungunahan ang pagtulong na ito ng aktres na si Nadia Montenegro. “Nakakainspire talaga yung biglang buhos nga ng tulong lahat gusto siyang makita matulungan,” ani Nadia.   


Masaya naman si Dick dahil hindi siya nakalimutan ng industriyang minahal niya. “I’m surprised maraming taong nagmamahal pa sa akin.”