Nang aminin ni Sarah na boyfriend na niya si Matteo Guidicelli, marami ang natuwa at naglahad ng kanilang mga saloobin at iba-ibang mga pananaw tungkol sa bagong magkarelasyon. Kaya naman nang matanong si Sarah sa kanyang reaksiyon tungkol dito, “Siyempre hindi naman po namin mape-please lahat pero maraming salamat sa lahat. Kumbaga wine-welcome yung relationship namin so maraming salamat sa suporta.”
At ngayong tapos na ang The Voice Kids kung saan mula sa kanyang kampo ang nanalo, mas marami na bang panahon si Sarah na mas pagtuunan ang kanyang atensyon sa kanyang personal na buhay lalo pa at matagal ding naglagi si Matteo sa ibang bansa. “Balanse lang po. Siyempre kumbaga alam naman natin ang priorities ng isa’t isa. Pareho kaming nasa industriya kaya kailangan balansehin lang namin yung time ng bawat isa.”
Hindi naman lingid sa kaalaman ng nakararami ang hindi masyadong magagandang nangyari lalo na sa buhay pag-ibig ni Sarah. Kaya naman sa ngayon, masasabi ba ng Popstar Princess na ito na ang isa sa mga pinakasamayang yugto ng kanyang buhay? “Happiest time ever? Masaya naman po ako pero yung happiest siyempre hindi naman tayo nagrereklamo pero marami pa tayong gustong gawin para sa pamilya natin, para sa sarili din natin.”
Natanong din si Sarah tungkol sa sinabi ni Judy Ann Santos, isa sa mga malalapit na kaibigan ng Pamilya Geronimo, na sinisiguro ni Judy Ann na gustong-gusto si Matteo ng kanyang mga magulang. “Bale ang masasabi ko dun basta hindi talaga dapat natatapos yung pag-honor at pagrespeto sa mga magulang hanggang ikasal ang isang couple kasi magiging magulang din nila yun hanggang sa magkatuluyan sila ‘di ba?”
Kaya naman kung ang lahat ba ng nangyayari ay “perfect timing”, ang reaksiyon ni Sarah dito, “Perfect timing? Hindi ko masasagot yan kasi lahat naman ng ginagawa natin especially sa love is a risk diba so tignan natin.”