Hindi na rin pinalagpas ng Push.com.ph ang pagkakataong tanungin ang Comedy Box-Office Queen tungkol sa napapabalitang bagong inspirasyong nagpapatibok sa puso ng aktres. Noong una’y ayaw pang masyadong pag-usapan ni Ai-Ai ang balitang ito. “Huh? Sino na naman yan? Expired! Hindi ako inspired, expired ako. Sino naman yan? Kasyo talaga basta sa chismis ang bilis-bilis niyo naman. Hindi naman nagpapatibok pero lagi ko namang sinasabi na open pa naman ako sa dating, whatever.”
Hanggang sa umamin na rin si Ai-Ai na mayroon siyang dinedate ngayon, na muli, mas bata sa kanya. At ang dahilan ng aktres dito, “Parati namang mas bata yung nalilink sa akin kasi first yun yung binata. Kasi kapag kaedad ko na may mga asawa na yun or hiwalay, ganyan. Parati namang mas bata.”
Hindi naman lingid sa kaalaman ng lahat ang nangyari kay Ai-Ai at sa kanyang huling nakarelasyon na si Jed Salang. Kinumpirma ng aktres na naayos na rin ang kanilang divorce noong Enero pa. “Matagal na kaming divorced, January 9 pa, 2013. Okay na, okay na, let’s all move on.”
Ibinahagi din ni Ai-Ai na getting to know each other stage pa lang sila ng nakaka-date niya ngayon. “Baka nandun sa getting to know each other na muna.” Ngunit sinabi nito na medyo matagal na rin silang nagdedate.
At kumpara dati, ngayon masasabi ni Ai-Ai na masaya siya sa estado ng kanyang buhay sa kasalukuyan. “Happy, peaceful. And career happy din. Happy lahat.”